Kull sena, il-Missjunarji tal-Karità, bl-għajnuna ta’ tim dedikat ta’ voluntiera żgħażagħ, jorganizzaw kamp tas-sajf ta’ tliet ġimgħat mat-tfal. Dan il-kamp jagħtihom l-opportunità li jgawdu minn attivitajiet bħall-għawm, mawriet lejn Għawdex u Splash and Fun, kif ukoll proġetti kreattivi bħal arts & crafts.
Storja li dejjem ispiratni hija ta’ Missjunarji tal-Karità, meta darba talbu lil Madre Tereża jekk jistgħux inaqqsu l-ħin tat-talb biex ikunu jistgħu jqattgħu aktar ħin jaqdu. It-tweġiba tagħha? Aktar ma naqdu, aktar għandna bżonn nitolbu. Din l-idea saret reali ħafna għalina matul il-kamp tas-sajf. Kien hemm tant x’nippjanaw; crafts, logħob, vjaġġi, u li faċilment konna nħossuna mgħaffġa. Madankollu, minkejja kemm konna okkupati, is-sorijiet dejjem sejħulna biex ningħaqdu magħhom fl-adorazzjoni. Dik is-siegħa ta’ silenzju tatna ċans nieqfu, nirriflettu fuq il-jum, u nitolbu għal dawk ta’ madwarna. Maż-żmien, bdejt nistenna dak il-ħin bil-ħerqa, u anke wara li rritornajt għal ħajja mgħaġġla t’accountant, baqgħet drawwa fija.
Mument li affettwani ferm kien meta ltqajt ma’ tifel ta’ 10 snin li dejjem kien jipprova l-paċenzja tagħna. Jgħajjar, jittanta lit-tfal l-oħra, u jiżżuffjettja ma kulħadd, inkluż lili. Wara diversi twissijiet u sa fl-aħħar time-out, bqajt mistagħġeb meta fl-aħħar tal-ġimgħa, ġie fuqi u skuża ruħu. Beda jibki, jistqarr li d-dar dejjem jiġi akkużat li jagħmel kollox ħażin. Sirt naf li hu kien responsabbli ta’ ħuħ ta’ sentejn u mill-faċendi tad-dar. Għalih, il-kamp tas-sajf kien l-uniku post fejn seta’ jkun sempliċiment tifel, spazju fejn ħassu milqugħ u maħbub. Kliemu biddilli l-perċezzjoni tiegħi. Mhux dejjem faċli tħobb lil dawn it-tfal, imma kif qalet Madre Tereża,
“L-imħabba tfisser li tkun lest tagħti sakemm tweġġa.”
Esperjenza oħra li ħalliet impatt kbir fuqi kienet meta volontarjajt fil-Kenja. Għal sena sħiħa, ġbarna fondi biex nimpjegaw ħaddiema tal-kostruzzjoni tal-lokal biex nibnu djar għal familji fil-bżonn. Qatt ma ninsa familja partikulari, li kienet tgħix f’dar tat-tin. Dar daqs friġġ, b’ħames membri tal-familja, kollha jorqdu taħt saqsaf daqs naqra. Fil-verita, jien u sħabi l-voluntiera l-oħra, konna biss parti żgħira mill-bini tad-dar il-ġdida tagħhom. Dar b’saħħitha, magħmula mill-ġebel u l-injam, b’aktar spazju biex jgħixu b’dinjità. Imma minkejja l-ftit li kellhom, l-ferħ tagħhom kien wieħed kbir u evidenti.
Imma l-iktar ħaġa li laqtitni kienet il-ġenerożità tagħhom. Kellhom ftit, iżda meta spiċċajna x-xogħol, offrewlna tazza te, l-aqwa ħaġa li setgħu jagħtu joffrulna. Dan il-ġest fakkarni li xi drabi, l-iktar ġesti sempliċi għandhom l-akbar tifsira.
Għalhekk, nistedinkom tagħmlu ħaġa waħda: iltaqgħu ma’ xi membru tal-familja jew ħabib li ilkom ma tkelmu. Sempliċement isimgħuh. Fid-dinja tal-lum, is-solitudni hija l-faqar il-ġdid, u anke l-iżgħar att ta’ tjubija jista’ jagħmel differenza kbira. Meta nieħdu l-ħin biex ningħaqdu ma’ ħaddieħor, ngħinu biex nibnu xi ħaġa ferm akbar minn dar materjali, ngħinu sabiex nibnu sens t’appartenenza u komunità vera.